குவியம் திரை ரசனைக் கூடுகையின் 46ஆம் நிகழ்வு மிகச் சிறப்பாக நடைபெற்றது. இம்மாத நிகழ்விற்கென இயக்குநர் ஜியோ பேபி இயக்கத்தில் வெளியான 'Kaathal - The Core (2023, Malayalam)' திரைப்படத்தை தேர்ந்து கொண்டிருந்தோம். உரையாடல் படத்தின் உருவாக்கம் குறித்து மட்டுமின்றி, கதையின் மையம் முன்வைக்கிற LGBTQ+ குறித்தும் கிளை பிரிந்தது. திருநங்கைகள், திருநம்பியர் குறித்த சமூக ஏற்பே பல காலத்திற்குப் பிறகு பல கட்டங்களைக் கடந்து சமீப காலங்களில் தான் மெல்ல மெல்ல முன்னேற்றம் காண்கிறது. சூழல் இப்படியிருக்க பால் புதுமையினர்கள் உள்ளிட்டோர் குறித்த சமூகப் புரிதலே பொதுவெளியில் இன்னும் பரவலாக்கப்படாத நிலையில், அவர்களை ஏற்றுக் கொள்ளல் என்பதற்கு இன்னும் காலம் பிடிக்கும். இதுதான் யதார்த்தம்.
கலந்துரையாடலில் ஜியோ பேபி அவர்கள் எடுத்துக் கொண்ட கதையை திரைமொழியில் கையாண்ட விதமே திரைப்படம் குறித்த பேச்சில் மையப்பொருளாக ஆனது. படம் நெடுகிலும் மிக நுட்பமான, கவித்துமான அழகுகளை மிக நேர்த்தியாக ஒளித்து வைத்திருப்பார் இயக்குநர். அதனை உரையாடலின் வழியாக ஒவ்வொருவரும் கண்டதைச் சுட்டிக் காட்டிப் பேசியதும், திறனாய்வு செய்யப்பட்டதும் மிக நல்ல உரையாடல் அனுபவமாக இருந்தது.
நடிகர்களின் உடல் மொழி, காட்சிகளில் ஓளியின் பயன்பாடு, மம்மூட்டி போன்ற ஒரு நட்சத்திர நடிகர் இது போன்ற படைப்புகளில் பங்களிக்கும் போது அதனால் பொதுவெளியில் உருவாகிற சிறப்பு கவனம், ஒவ்வொரு கதாபாத்திரத்தின் character arc திரைக்கதையில் எழுதப்பட்டிருக்கும் விதம், அவர்களுக்குகிடையே உருவாகிற உறவுச்சிக்கல்களை காட்சிப்படுத்தியிருக்கும் விதம் என பற்பல அம்சங்கள் உரையாடலின் போது வந்து போயின. மிக நிறைவான இன்னொரு நிகழ்வாக இது அமைந்தது. இந்நிகழ்வில் கல்லூரி மாணவர்கள் கலந்து கொண்டது கூடுதல் மகிழ்ச்சி என்றனா் ஆகம் கலையகத்தினா்.
செய்தியாளர் அ. ரவி
Comments
Post a Comment