ஜூன் 4க்கு பிறகு நடக்கும் மாற்றம்..! கை மாறும் அதிமுக..? - டிடிவி தினகரனை கைகாட்டும் அண்ணாமலை..!

தமிழகத்தில் மக்களவைத் தேர்தல் வரும் வெள்ளிக்கிழமை நடைபெற உள்ளது. இதற்கான பிரச்சாரம் வரும் புதன்கிழமையுடன் நிறைவடைகிறது. இதனை முன்னிட்டு அரசியல் கட்சி பிரமுகர்கள் உச்சக்கட்ட பிரச்சாரத்தில் ஈடுபட்டு வருகின்றனர். அந்த வகையில் பாஜக தலைமையில் போட்டியிடும் அமமுக பொதுச் செயலாளர் டிடிவி தினகரனை ஆதரித்து தமிழக பாஜக தலைவர் அண்ணாமலை இன்று தேனி மக்களவைத் தொகுதியில் பிரச்சாரம் செய்தார்.

அப்போது பேசிய அவர் , அண்ணாமலையும், டிடிவி தினகரனும் இணைந்துள்ளதாக தமிழகத்தின் அரசியல் மாறுவதாக தெரிவித்தார். அமமுக சார்பில் டிடிவி தினகரன், தனது தொண்டரை நிறுத்தியிருக்கலாம். ஆனால் 400 இடங்களை பெற்று மோடி தலைமையில் ஆட்சி அமைய வேண்டும், அதில் தேனியின் குரலாக தானும் இருக்க வேண்டும் என்பதால் டிடிவி தினகரன் போட்டியிடுவதாக கூறினார்.

மேலும் மோடியிடம் இருந்து இந்தியாவை காப்பாற்ற வேண்டும் என்று முதல்வர் ஸ்டாலின் கூறியதற்கு பதிலடி கொடுத்த அண்ணாமலை, தமிழகத்தை முதலில் ஸ்டாலினிடம் இருந்து காப்பாற்ற வேண்டும் என்றார். தமிழகத்தை கோபாலபுரம் குடும்பத்திடம் இருந்து காப்பாற்ற வேண்டும் என்றும் 33 மாதங்களாக அவர்கள் தமிழகத்தில் கொள்ளையடித்துக் கொண்டிருப்பதாகவும் குற்றம்சாட்டினார்.

ஸ்டாலின் தலைமையில் உள்ள திமுகவும், எடப்பாடி பழனிச்சாமி தலைமையில் உள்ள அதிமுகவும் ஒன்றுதான். கட்சியின் பெயர்களும் தொண்டர்களும்தான் வேறு, ஆனால் தலைவர்களும் அவர்களின் செயல்பாடுகளும் ஒன்றுதான் என்றும் அண்ணாமலை தெரிவித்தார். டிடிவி தினகரனை தோற்கடிக்க வேண்டும் என்பதற்காக இரண்டு வேட்பாளர்களும் இணைந்து செயல்படுகிறார்கள் என்றும் அண்ணாமலை குற்றம்சாட்டினார்.மேலும் ஜூன் 4 ஆம் தேதிக்கு பிறகு அதிமுக டிடிவி தினகரனின் கைக்கு வந்துவிடும் என்றும், அதிமுக தொண்டர்கள் அனைவரும் தேர்தலுக்கு பிறகு அமமுகவுடன் இணைய போகிறார்கள் என்றும் தெரிவித்தார். தங்களை வழிநடத்தக் கூடிய உண்மையான தலைவன் யார் என்பது தொண்டர்களுக்கு தெளிவாக தெரியும் என்றும் கூறிய அண்ணாமலை, பூச்சாண்டிகளையும், போலித் தலைவர்களையும் தொண்டர்கள் கண்டுபிடித்து விடுவார்கள் என்றும் கூறினார்.

அதிமுக டிடிவி தினகரனின் கையில் இருந்திருந்தால், ஸ்டாலின் முதல்வர் ஆகியிருக்க முடியாது என்றும் அண்ணாமலை தெரிவித்தார். ஸ்டாலினுக்கும் எடப்பாடி பழனிசாமிக்கும் டிடிவி தினகரனை பிடிக்காது என்றும் அதனால் அவரை தோற்கடிக்க முயன்று வருகிறார்கள் என்றும் தெரிவித்துள்ளார். ஏற்கனவே தேர்தலுக்கு பிறகு அதிமுக அழிந்து போய்விடும் என்று அண்ணாமலை கூறியிருந்தார். அதற்கு அதிமுக தலைவர்கள் கடும் கண்டனம் தெரிவித்து வந்த நிலையில் தற்போது தேர்தலுக்கு பிறகு அதிமுக டிடிவி தினகரன் வசம் வந்துவிடும் என அண்ணாமலை கூறியிருப்பது பரபரப்பை ஏற்படுத்தியுள்ளது.